هاضت هواجيسي وهاضن الافكار

يقول الشاعر موسى العنزي في القهوة :

هاضت هواجيسي وهاضن الافكار

من شاعر جاب الجزايل سموّه

*

ياللي على كيف المعاميل دوّار

أعطيك له وصفه وللكيف سوّه

*

الكيف ياهل الكيف في شبة النار

بغمرالحطب يجذبك من بعد ضوّه

*

في ربعة اهل الطيب وافين الاشبار

اهل الوفاء والجود و اهل المروّه

*

ودنيت محماسك على حافّة اوجار

وجذبت له جمرٍ تواهج .. سنوّه

*

واخترت من بن اليمن غال الاسعار

منتوج خولاني ومحصول توّه

*

وحمست بِنك لين لوّح بالإشقار

متساويٍ حمسه ولا به … تشوّه

*

ودقيته بنجرٍ ينادي …. لخطّار

يعلو صداه ان طق طاره بقوّه

*

وفوحت ميك من هماليل الامطار

صافٍ قراح و من شهاليل نوّه

*

وقصرت ناره لين بنّت بالأقمار

وطافت قموره صافيه في علوّه

*

ولقمتها في دلة الكيف ، بابهار

منتوج فاخر منتقينه … انقوّه

*

الزعفران وثالث الهيل … مسمار

يصبغ بلون خضاب كف الفتوّه

*

وسقته لعكفان الشوارب هل الكار

في مجلسٍ ما فيه نمه وسوّه

*

ماغير نقل اخبار ماضين الاذكار

سوالفٍ ما فيه … زيف وتموّه

*

تناقلوا ما بينهم جزل الاشعار

وكلٍ على طرح الجزيله ينوّه

*

والجار يفرح يوم يلفي له الجار

يكثر له الترحيب مع طيب خوّه

*

في روضةٍ فاحت بها ريح الازهار

متخالطٍ ريح الخزامى .. وحوّه

*

في خايعٍ ما دوجوا به هل الطار

ما غير راع الذود فيها .. يدوّه

*

يروح عنك الهم وتزول الاكدار

ويروق راع الكيف ويزين جوّه

شكر جزيلا للطرح القيم
ننتظر المزيد من ابداع مواضيعك الرائعه
تحيتي وتقديري لك